Psa 35 | JAE | STEP | O Apômtau, ônac siŋ êndêŋ êsêac, taŋ sêjac aê semoa naŋ. Ôku êsêac, taŋ sêku aê tulu sêmoa naŋ tulu.

Psalms 35

PESALEM 35

Ŋac gaôc gêŋwapacŋa nê mec Anôtô ênam eŋ saŋa

1 O Apômtau, ônac siŋ êndêŋ êsêac, taŋ sêjac aê semoa naŋ.
Ôku êsêac, taŋ sêku aê tulu sêmoa naŋ tulu.
2 Ôja lautuc to maluku sa
ma ôndi mêŋônam aê samaŋ.
3 Ôkôtêŋ kêm to ôndaiŋ olo endeŋ lau, taŋ sebe sê aê tôŋ naŋ.
Ôsôm êndêŋ ŋoc katuc gebe “Aê tec gabe janam aôm sa.”

4 Ôkêŋ lau, taŋ sesom lêŋ senseŋ aê suŋa naŋ,
têtu meloc ma sêmbac tauŋ su.
Êsêac taŋ sêkic aêŋoc biŋ naŋ,
sênu tauŋ su tomajeŋgeŋ sêc sêmu sêna.
5 Ôkêŋ êsêac têtôm jataê, taŋ mu kelelo naŋ,
ma Apômtaunê aŋela êtiŋ êsêac su.
6 Êsêacnêŋ intêna êtu kesec ma ŋalêŋô êsa
ma Apômtaunê aŋela êjanda êsêac.

7 Êsêac sêwa lakô aê kelecgeŋ
ma sêkwê sê gebe aê janac tauc êndu.
8 Gêŋwapac êtap êsêac sa eb tageŋmaŋ ma tauŋ sêsêp nêŋ lakô, taŋ sêwa kelecgeŋ naŋ,
e gacgeŋ sênaŋa.

9 Go ŋoc ŋalêlôm êtu samuc Apômtau
ma êôc eŋ sa gebe gêjam aê kêsi.
10 Aê oc jasôm toŋoc ŋalêlôm samucgeŋ gebe
“Apômtau, asa oc êtôm aôm,
taŋ kôjaŋgo ŋac gêŋgôŋ jageoŋa su aŋga ŋaclainê
to kôjaŋgo ŋalêlôm sawa, taŋ gêôc gêŋwapac naŋ, su aŋga ŋac, taŋ kêkôniŋ eŋ tôŋ naŋ.”

11 Imbeleŋ dansaŋ sêsa gebe mêŋsenseŋ aê,
têtu kênac gêŋ, taŋ gajam kauc ŋam naŋ, gêdêŋ aê.
12 Aê kamoasiŋ êsêac, mago sêkêŋ sec gêjô ŋajam
e aê katuc gêbac su.
13 Mago gêdêŋ taŋ gêmac kêtap êsêac sa naŋ, aê kasô talu kêtu ŋoc ŋakwê.
Aê gajam dabuŋ mo ma kateŋ ŋoc mec gasaŋ-laŋôcanô auc.
14 Gagôm tauc amboac gagôm kêtu ŋoc ŋac me lasic teŋŋa.
Gaŋgôŋ kapô gaducgeŋ katôm ŋac teŋ ŋalêlôm ŋawapac kêtu tênaŋa.

15 Mago gêdêŋ taŋ aê katu sec naŋ, êsêac sêkac sa toôliŋ kêpigeŋ sebe sêsu aê susu.
Ma lau, taŋ gajam kauc êsêac naŋ, sêsôm biŋ alôb- alôb kêpi aê gedeŋ tôŋgeŋ.
16 Êsêac têtôm sêsu-susuwaga sêjam aê katu ôwê to sêgôm aê katu meloc
ma sêmôêŋ luŋluŋ gêdêŋ aê.

17 O Apômtau, gobe ôlic gêŋ tonaŋ e êndêŋ ondocgeŋ.
Ôjanda katuc su aŋga êsêanêŋ biŋ alôb-alôb. Ônam aê kêsi aŋga lewe matac nêŋ.
18 Go janam daŋge aôm êsêp taêsam sêkac tauŋ sa ŋalêlôm.
Aoc êôc aôm êsêp lau taêsam ŋanô taŋeŋsuŋ.

19 Ôkêŋ êsêac, taŋ sêkic aêŋoc biŋ sêsiŋgeŋ sêmoa naŋ, sêmajec aê atom.
Ôkêŋ êsêac, taŋ sêkêŋ kisa aê ŋabiŋ masigeŋ naŋ, sêsênic mateŋ êtu aêŋa atom.

20 Êsêac sêsôm biŋ malô-malô atom.
Ma sêgôliŋ biŋdansaŋ kêpi gamêŋ tau ŋalau wapac.
21 Êsêac sêpa laweŋgeŋ kêtu aêŋa ma sêmôêc gebe “Kec, kec
tauŋ mateŋ anô talic ŋanôgac.”
22 O Apômtau, aôm gôlicgac, amboac tonaŋ ônam taôm tôŋ atom.
O Apômtau, ômoa jaêc aê atom.
23 Matam jali êsa to ôndi sa gebe ômansaŋ ŋoc biŋ êtu katô.
O ŋoc Anôtô to ŋoc Apômtau, ônam gôliŋ ŋoc biŋmaŋ.
24 O Apômtau ŋoc Anôtô, aôm ŋac gêdêŋ. Ômêtôc ŋoc biŋ êtu katô
gebe êsêac ôliŋ êpi atu aêŋa atom.
25 Ôkêŋ êsêac sêômac aê êtu biŋ, taŋ sêpuc boa gêc nêŋ ŋalêlôm naŋŋa atom gebe “Kec, gêŋ amboac tonaŋ tec aêac taêŋ gêjam.”
Ôkêŋ êsêac sêkêli tauŋ gebe “Aêac aseŋ eŋ sugac” naŋ atom.

26 Ôkêŋ êsêac samob, taŋ ôliŋ kêpi kêtu ŋoc gêŋwapacŋa naŋ, majeŋ to môkêŋapac ŋawapac êsa acgom.
Ôkêŋ êsêac, taŋ tetoc tauŋ sa gêdêŋ aê naŋ, têtu meloc ma majeŋ êkôm êsêac auc.

27 Ôkêŋ êsêac, taŋ sêlic aê ŋajam naŋ, tauŋ têntac ŋajam to ôliŋ êpigeŋ.
Ma ôkêŋ êsêac sêsôm ênêc awêgeŋ gebe”Apômtau eŋ ŋac kapôêŋ. Eŋ taê gêjam nê sakiŋwaga gebe êmoa ŋajamgeŋ.”
28 Imbeloc oc êwaka nêm biŋgêdêŋ sa,
êŋgôm waem êtu tapa endeŋ tôŋgeŋ. ^{▼▼Dawidnê teŋ.}